ES-nevndin fer undir kanning av Google fyri møgulig brot á talgildu reglurnar hjá ES.
Tað upplýsir ES-nevndin í tíðindaskrivi.
Nevndin fer at greiða frá, um Google frátekur heimasíður og innihald hjá tíðindamiðlum og øðrum útgevarum í leitiúrslitunum hjá Google.
- Vit hava varhugan av, at politikkurin hjá Google ikki loyvir, at tíðindaútgevarar verða viðgjørdir á ein rættvísan, rímiligan og ódiskriminerandi hátt í leitiúrslitum, sigur næstforkvinnan í ES-nevndini, Teresa Ribera.
Hon sær málið hava týdning fyri tíðindamiðlar í Evropa og teirra evni at vinna pening.
- Vit fara at kanna málið fyri at tryggja, at tíðindaforløg ikki missa týðandi inntøkur í eini truplari tíð fyri vinnuna. Og fyri at tryggja, at Google fylgir lógini um talgildar marknaðir, sigur Teresa Ribera.
Fráboðanin kemur eftir at eftirlitsverkið hjá nevndini hevur víst tekin um møguligt brot á reglurnar.
Serliga niðurraðfestir Google tíðindamiðlar og heimasíður hjá øðrum útgevarum, tá tær hava innihald frá vinnuligum samstarvsfeløgum.
Sambært nevndini kann hetta ávirka møguleikarnar hjá forløgum at vinna pening av teirra innihaldi.
Fráboðanin kemur í samstundis sum nógvir danskir miðlar stríðast við fallandi lýsingarinntøkur.
ES-nevndin leggur dent á, at fráboðanin hósdagin bert skal síggjast sum eitt tekin um, at nevndin fer at røkja málið.
Við øðrum orðum er hetta enn ikki ein niðurstøða um, at Google niðurraðfestir tíðindamiðlar.
Um nevndin finnur prógv fyri, at lógin hjá ES um talgildar marknaðir ikki er hildin, verður boðað Google frá.
Síðani skal felagið greiða frá, hvussu tað fer at bøta um møguliga brotið.
Málið kann í síðsta enda hava við sær, at ES-nevndin áleggur Google eina bót upp til 10 prosent av samlaða heimsumsetninginum hjá felagnum.
Bøturnar kunnu hækka upp í 20 prosent, um reglurnar verða brotnar aftur.
Nevndin fer at royna at gera kanningina lidna innan 12 mánaðir.
/Ritzau/
