Hví fert tú / fert tú ikki á ólavsøku?
So vítt eg minnist, havi eg verið á hvørjari tí einastu ólavsøku, síðan eg var eini trý-fýra ára gamal. Onkuntíð bara eina løtu, men altíð til okkurt. Í ár fari eg ikki. Nøkur vinfólk spurdu, um vit skuldu fara til Svínoyar, og vit tóku av. Tá er mann nokk byrjaður at blíva klaksvíkingur :)
Hvussu heldur tú ólavsøkuna?
Í ár halda vit ólavsøku úti í Svínoy, og eg veit ikki, hvussu tað verður, tí tað havi eg ikki roynt fyrr. Vanliga brúka vit ólavsøkuna til at heilsa upp á fólk, vitja familju og vinfólk, fara til kappróður og á Doktaragrund. Setanin av løgtinginum hevur avgjørt sína sjarmu eisini.
Hvat eigur ein at fara til á ólavsøku?
Á ólavsøku eigur man at fara til kabarett, í KFUM, til kappróður, setan, midnáttarsang, Doktaragrund og á háskúlan, um stundir eru til tað.
Hvat kundi verið øðrvísi á ólavsøku?
Tað fer í ár at mangla eitt stað við einum ordiligum fiskibrunni, so har er ein marknaður at fara eftir. Annars haldi eg bæði ólavsøkusetanin, midnáttarsangurin og tiltakið hjá Miðlahúsinum hava tørvi á onkrari endurnýggjan.
