Sum grundgeving fyri ynskinum um serloyvi at parkera sigur Heðin Mortensen, at hann má sleppa at seta bilin á parkeringsplássið á Vaglinum, tá bráðneyðugir fundir o. a. stinga seg upp, har tíð ikki er at seta bilin í garasjuna. Garasjan, sum hýsir borgarstjórabilinum, er í Tórsgøtu millum Reinsaríið og Miðlahúsið. Borgarstjórin vísir til avtaluna, sum býráðið hevur við landsstýrið um parkering hjá landsstýrismonnum og løgmanni í Tinganesi. Teir hava fingið eitt frámerki frá fútanum at leggja í bilin, soleiðis at hesir kunnu standa í nærri ávísum básum í óavmarkaða tíð.
Íbúgvar í gomlu Havnini søktu fyri nøkrum árum síðani um at fáa eina serskipan viðvíkjandi parkering, har eisini varð víst til avtaluna við landsstýrið – sum gevur landsstýrismonnum og løgmanni loyvi at parkera í teirra grannalag.
Men tá var svarið frá býráðnum, at eingin skal hava serrættindi at parkera í Havnini.
Umsøkjararnir fingu eisini skrivligt svar frá Tórshavnar Kommunu um, at avtalan við landsstýrið varð uppsøgd.
Men nú er í øllum førum vent í holuni. Landsstýrismenn og løgmaður hava framvegis serrættindi fram um íbúgvarnar at parkera á ávísum básum í Tinganesi – og júst hesa grundgeving hava tekniski stjórin hjá Tórshavnar Kommunu, Jákup Egholm Hansen, og býarverkfrøðingurin, Boði Haraldsson, fyri at ganga ynski borgarstjórans á møti.
