Hondbóltur
Tað eru kanska ikki endliga dystir, sum verða roknaðir sum avgjørdir topp-dystir, sum standa á skránni, men í nógvum førum verður tó spennandi at síggja, hvussu ymsu liðini eru fyri, nú tey hava brynjað seg til eitt nýtt kappingarár.
Hjá monnunum man størsti áhugin helst vera um dystin í Hoyvíkarhøllini, har H71 við Hannis Wardum á beinkinum skal taka ímóti Kyndli. Umframt Kyndils-veteranin á beinkinum, hava hoyvíkingar til í vetur eisini fingið tilgongd av Jakob Jónsson, og so er spurningurin, um hann er maðurin, sum av álvara kann fáa glið á stóru ambitiónirnar hjá H71.
Á Hálsi skal Neistin royna at prógva, at liðið í ár er betri ført fyri at klintra móti oddinum, enn teir vóru í fjør, tá árið mest av øllum má lýsast sum vónbrot, og í Vestmanna verða tað VÍF og KÍF, sum fara at takast.
Spennandi Neista-lið
Hjá kvinnunum tykist Neistin vera liðið, sum hevur gjørt mest við at styrkja um hópin, og fyrsta royndin hjá teimum verður í Vestmanna, har kenningurn, Sophus Dal-Christiansen aftur í ár stendur við róðrið.
Spennandi verður eisini at vita, hvørt Stjørnan aftur í ár skal hava somu styrkina, tá Stjørnan kemur á vitjan, og á Giljanesi skulu meistararnir úr VB prógva, at tær aftur í ár eru eitt lið, sum roknast skal við.
Seinasti dysturin verður í Runavík, har grannarnir, Tjaldur og StÍF fara at takast.
