Hernaðarliga palestinska Hamas-rørslan hevur umvegis Reyða Kross latið ísraelska herinum, IDF, í Gaza fýra ísraelskar gíslar.
Tær fýra kvinnurnar, sum eru herfólk í ísraelska herinum, eru komnar til Ísraels, boðar ein talsmaður í ísraelska herinum frá, sambært tíðindastovuni Reuters.
Fyrr í dag vístu sjónvarpsupptøkur frá einum miðtorgi í Gaza City, at vápnaðir Hamas-menn í masku fylgdu teimum til fýra bíðandi akfør hjá Reyða Krossi.
Túsundtals palestinar eru savnaðir í Gazabýni at vera vitni til, at gíslarnir verða latnir.
Samstundis vísa sjónvarpsmyndir úr Ísrael túsundtals fólk á einum torgi í býnum Tel Aviv. Nógv halda skelti uppi við myndum av gíslunum, og nógv lata tárini renna.
Hamas hevði frammanundan boðað frá, at fýra ungar kvinnur, sum eru herfólk, skuldu latast leysar leygardagin.
Afturfyri skal Ísrael sleppa einum fleiri palestinskum fangum úr ísraelskum fongslum.
Hamas hevur lagt fram ein lista við 200 nøvnum á fangum, sum Ísrael sambært palestinsku rørsluni skal lata leys leygardagin. Talið og nøvnini eru ikki váttað av Ísrael.
70 av teimum verða útvíst til øki uttan fyri Gazageiran og Vestara Áarbakka, boðar Hamas frá.
Teir fýra ísraelsku gíslarnir, sum skulu sendast heim til Ísrael eftir 477 dagar í fangaskapi, eru Karina Ariev, Danielle Gilboa, Naama Levy og Liri Albag.
Sambært blaðnum The Times of Israel er Liri Albag 19 ára gomul, meðan hini eru 20 ára gomul.
Allar fýra vórðu tiknar gíslar frá hernaðarstøðini Nahal Oz, sum liggur tætt við markið hjá Ísrael til norður Gaza.
Tær vóru herfólk í sokallaðari vakthavandi eindini.
Sambært bretska miðlinum BBC doyðu fleiri enn 60 hermenn, tá Hamas leyp á støðina 7. oktober 2023.
Fangaumbýtið millum Ísrael og Hamas er partur av vápnahvíld, sum kom í gildi 19. januar.
Hendan dagin vórðu tríggir teir fyrstu ísraelsku gíslarnir leyslatnir. Tað vóru tríggjar kvinnur. Afturfyri slepti Ísrael 90 palestinskar fangar leysar.
Tilsamans 33 ísraelskir gíslar verða væntandi leyslatnir í einum seks vikur langa fyrsta umfari av vápnahvíldini millum Ísrael og Hamas.
Afturfyri verða umleið 1900 palestinar væntandi leyslatnir úr fongslunum í Ísrael, skrivar AFP.
/Ritzau/
