Stutt fyri klokkan 01 í nátt fekk løgreglan eina fráboðan frá bilførara, sum koyrdi á vegnum oman fyri Funning.
- Viðkomandi visti at siga, at her var sera hált - ja, so hált, at tað tók eini 20 sekund, áðrenn bilurin steðgaði, hóast tú bremsaði við ongari ferð.
Vaktleiðarin visti í morgun at siga, at tíbetur kom bilførarin fram heilskapaður og bilurin somuleiðis.
Um náttina verður ikki saltað, og tí er umráðandi, tá líkindini á vegunum gerast so trupult, sum í nátt, at vera árvakin og ansin.
Í morgun visti vaktleiðarin eisini at siga, at tey um middagsleitið í gjár fingu eina fráboðan um ein stein, sum var komin oman á vegin.
- Hetta var við vestara tunnilsmunna í Gásadalstunlinum. Steinurin var ikki mannbærur, og Landsverk tók sær at uppgávuni, verður lagt aftrat.
