P/F Hotel Hafnia, ið hevur sum høvuðsvirksemi at eiga og reka Hotel Hafnia og Hotel Bradan í Havn, hevði í fjør eitt avlop upp á 8,5 milliónir krónur.
Tað vísir roknskapur felagsins, sum er kunngjørdur á vinnuvitan.biz, og tað er samstundis besta árið tey 20 árini, sum síggjast í skipanini hjá vinnuvitan.biz.
– Avlopið er nakað verri enn ætlað, sigur leiðslan í felagnum, sum tó væntar, at ársúrslitið fyri hetta árið verður á sama støði sum í 2023.
Eginognin hjá felagnum er 64,6 milliónir krónur.
Felagið skrivar millum annað í ársfrágreiðingini, at bæði Hotel Hafnia og HOtel Brandan hava góðkenningina »GreenKey Hotel«, sum merkir, at altjóða krøv verða sett til umhvørvisvernd og burðardygd. Aðaltáttir í hesum eru at avmarka óneyðuga nýtslu, at nýta vørur og tænastur úr nærumhvørvinum, og at virka vistfrøðiligt. Mannagongdir eru settar í verk, og starvsfólk eru sum heild tilvitað um at virka burðardygt.
Smyril Line er einasti partaeigari, sum er skrásettur at eiga meira enn 5 prosent í felagnum.
Bruttoúrslitið hjá felagnum var slakar 70 milliónir krónur. Starvsfólkakostnaður eru góðar 44 milliónir krónur. Úrslitið áðrenn skatt var 10,4 milliónir krónur og skatturin 1,9 milliónir krónur, sum gevur úrslitið upp á 8,5 milliónir krónur í mun til 4,2 milliónir krónur árið fyri.
Felagið upplýsir, at løn til leiðslu er 1.459.000 krónur, og at starvsfólkatalið er 140 fólk í mun til 160 fólk árið fyri.
