Hiphop, street, modernaður dansur, jazz og house. Hesir dansir eru grundarlagið undir dansibólkinum Hóps, sum seinastu árini hevur uppbygt eina heldur øðrvísi dansimentan. Dansur er ikki nakað nýtt fyribrigdi í Føroyum, men dansurin, ið kvinnurnar í Hóps bjóða, má sigast at verða heldur øðrvísi, enn tað vit eru von við.
Hiphop, street, modernaður dansur, jazz og house dansur, er tað ið ungu kvinnurnar mugu sigast at verða serfrøðingar í, og áhugin fyri júst hesum dansum er voksin munandi síðan Hóps bleiv stovnað.
Dansibólkurin hevur verið til í mong ár, men tað er bert eitt ár síðani at bólkurin fekk navnið Hóps.
- Vit valdu at finna eitt gott navn til bólkin, og á tann hátt marknaðarføra okkum, sigur Jenny Maria Vestergaard, ið er ein av dansarunum í Hóps.
Í byrjanini var ikki nógv at takast til hjá bólkinum, men so hvørt sum tær hava framført er áhugin voksin, og tilboðini eru blivin fleiri í talið.
- Vit framførdu ikki nógv, og fingu heldur ikki nógvar pengar fyri okkara framførslur í byrjanini, men nú hava vit uppbygt okkum eitt jaligt umdømi, og onkursvegna eina viðurkenning sum ger at vit eru meira verdar og eftirspurdar, sigur Jenny Maria.
Um vikuskifti skal Hóps framføra á Liva vælverustevnuni sum verður í Klaksvík leygardagin, og Jenny Maria sigur, at framførslan verður heldur øðrvísi enn tað, ið áður er sýnt.
- Tað verður ein blanding millum house- og hiphop dans, so tað verður allarhelst øðrvísi enn tað, ið føroyingar flest áður hava sæð, sigur Jenny Maria.
Les meira um dansibólkin í Sosialinum mánadagin
