Tað fer ikki at henda, at gomul føroysk matmentan fer at detta niðurfyri, hóast nýggjar reglar koma í gildi tann 1. juni. Tað sigur Johan Dahl landsstýrismaður í vinnumálum. Ein tann seinasta dagin áðrenn løgtingið fór í jólafrí, spurdi Bjørt Samuelsen, tingkvinna fyri Tjóðveldi, landsstýrismannin, hvussu hann ætlar at loysa avbjóðingarnar, tá undantøkini at selja føroyskt kjøt í handlum og matstovum fer úr gildi í juni 2015.
Tað hevur ofta verið ført fram, at hetta fer at forkoma føroyskari matmentan, tí nú verður allur føroyskur matur einstáttað ídnaðarframleiðsla og sostatt fer fjølbroytni at hvørva. - Hetta fer ikki at henda sigur Johan Dahl Hann sigur, at páhaldið um, at matmentanin fer at hvørva, byggir á manglandi vitan. Hann sigur, at nýggju reglarnar eru bara galdandi fyri turt og ræst kjøt, sum verður selt í handlum og í matstovum. - Hinvegin hevur tað leingi verið galdandi, at feskt kjøt av seyði ella neyti, avroð og annað, skal vera framleitt á gókendum virkjum.
Men hóat nýggju reglurnar koma í gildi, fer tað framvegis at bera til hjá fólki at keypa akkurát hvat tey vilja beinleiðis frá bøndrum. Einasta broyting er, at tað, sum verður selt í handlum, og á matstovu, skal hagreiðast á góðkendum virkjum. - Endmálið er at veita fólki eina matvørutrygd og tí er meginreglan, at matvørur skulu framleiðast á góðkendum virkjum. - Men í føroyum hava vit nógv undantøk, nettupp tí vit hava eina heilt serliga matmentan, serliga, hvt seyðakjøti umræður, sigur Johan Dahl.
Hann staðfestir, at meginpartur verður seldur í duraølu og tað verður ikki broytt, tí tað er ein spurningur ímillum keypara pg seljara. - Hetta álit kann ikki vera til staðar, tá ið selt verður í handlum ella matstovum, leggur hann afturat. - Og tað er einki annað enn rímiligt, at eisini tann keyparin, sum keypir matin í einum handli, ella matstovu, kennir seg tryggan í, at vøran er framleitt og hagreitt á heilsufrøðiliga rættan hátt, sigur Johan Dahl.
Hann heldur, at tað er eisini hugsandi, at Heilsufrøðiliga starvsstovan fer at undir eitt miðvíst kunningararbeiðið um, hvussu hjallar og framleiðslurúm kunnu skipast. Hann staðfestir samstundis, at fyribils fer hann ikki at broyta matvørulógina aftur, sum annars varð einmælt samtykt í Løgtinginum. - Hon má standa sína roynd áðrenn hon verður broytt. Men er tað neyðugt at gera tillagingar, eiga vit at gera vit alt fyri at gera tær tillagingar, sigur hann. - Málið er, at teir bøndur, sum hava hug at selja turt og ræst, eisini fáa skipað viðurskiftini so, at tað ber til - og tað skal ikki so nógv til fyri at fáa hjallar góðkendar, sigur Johan Dahl. Onnur tingfólk halda, at tað hoyrir nútíðini til, at keyparin veit, hvaðani maturin stavar og ta ábyrgdina fáa handlar og matstovur valla runnið undan. Men endamálið má vera at gera reglurnar so lagaligar, at tað ber til at selja føroyskar landbúnaðarvørur, uttan at skula noyðast at lúka somu treytir sum stórar útflutningsfyritøkur. |
