Vaktleiðarin á løgreglustøðini visti í morgun at siga, at tað sum heild var stak friðarligt í býnum í nátt, og fólk tóktust glað.
Helst var tað fantastiska hondbóltsúrslitið hjá føroyska landsliðnum í dystinum móti Noregi, har Føroyar fingu javnleik, sum var ein orsøkin.
- Tað var heldur ikki so nógv fólk í býnum, men tað tóktist, sum fantastiska úrslitið gjørdi tey, sum vóru farin sær ein túr, glað, sigur vaktleiðarin.
Her var ikki nógv hjá løgregluni at gera.
Í Føroyum hevur løgreglan heldur einki frætt frá sínum starvsfeløgum í Berlin um, at lagið á mongu føroysku áskoðarunum ikki eisini hevur verið gott.
- At vit einki frættu haðani, taka vit, sum eitt tekin um, at alt hevur gingið upp á stás, sum vit sjálvsagt eisini vóna, at tað hevur, segði vaktleiðarin í morgun.
Tá tað er leygarkvøld er løgreglan sjáldan púrasta arbeiðsleys.
- Í nátt var ein maður ólátaður í býnum, og tá hesin var til ampa, varð neyðugt hjá løgregluni, sum var úti í býarumhvørvinum, at dempa mannin niður.
Vaktleiðarin leggur aftrat, at hesin fær eina bót fyri brot á skilhaldsreglurnar, sum tað verður rópt.
##med2##
