Í Suðurafrika eru tey nú biðin um at fyrireika seg til deyðsboðini av mannarættinda stríðsmanninum, Nelson Mandela.
Tað skrivar Sky News í dag.
Tann 94 ára gamli Nelson Mandela hevur ligið á sjúkrahúsi í 19 dagar við lungabruna, men nú er hann so veikur, at hann er lagdur í respirator, tí hann orkar ikki at anda sjálvur.
Boðað er frá, at hann er ógvuliga sjúkur og hóast tað er ímóti siðvenjuni har á leiðini at tosa um deyðan ímeðan fólk enn eru á lívi, eru tey biðin um at fyrireika seg upp á tað ringasta, sum tey orða seg.
Uttanfyri sjúkrahúsið í Pretoria, har Mandela liggur, leggja fólk í hópatali blomstur og kort at vísa sín stuðul.
Samstundis hevur løgreglan vaktarhald uttanfyri sjúkrahúsið og hevur avmarkað ferðsluna har um vegir.
Sky News skrivar, at hetta er fyrstu ferð, at fólkið í Suðurafrika tykist at góðtaka, at, at Faðir Tjóðarinnar, sum Mandela eisini verður kallaður, eisini er deyðiligur.
- Hann hevur gjørt so nógv fyri hetta landið. Tað er ræðuligt, men hetta mugu vit góðtaka, sama hvussu hart tað er, segði ein kona, sum las eini boð, sum eru klistrað á hospitalsveggin, við Sky News.
Suðurafrikanski forsetin, Jacob Zuma sigur, at Mandela er álvarsliga sjúkur og at tjóðin noyðist at góðtaka, at hann er vorðin gamalur.
