Í morgun byrjaði fundur í býnum Antalya í Turkalandi millum russiska uttanríkisráðharran, Sergej Lavrov og ukrainska uttanríkisráðharran, Dmytro Kuleba.
Í russiska uttanríkisráðnum verður í morgun upplýst, at samrøðurnar eru í gongd millum partarnar. Talsmaðurin hjá Kreml, Dmitrij Peskov, sigur sambært tíðindastovuni NTB, at fundurin er sera týdningarmikil.
- Russland vil viðgera síni kjarnukrøv, har Ukraina eitt nú skal viðurkenna hálvoynna Krim sum russiskt øki, eins og Ukraina skal góðtaka, at økini, Donetsk og Luhansk, eru sjálvstøðug, sigur Dmitrij Peskov.
Sambært Reuters sigur ukrainski uttanríkisráðharrin, Dmytro Kuleba, at vónirnar hjá honum til fundin við Sergej Lavrov eru avmarkaðar.
Væntandi luttekur turkiski uttanríkisráðharrin, Mevlüt Çavusoglu, eisini á fundinum við uttanríkisráðharrarnar í Russlandi og Ukraina.
Tað er turkiski forsetin, Recep Tayyip Erdogan, sum hevur tikið stig til at fáa uttanríkisráðharrarnar at hittast at umrøða krígsstøðuna í Ukraina, og soleiðis roynir hann seg nú í leiklutinum sum meklari í stríðnum.
- Eg vóni, at fundurin kann slóða fyri einari endaligari vápnahvíld millum londini. Við hesum vilja vit royna at byrgja upp fyri, at kreppan í Ukraina endar í einari vanlukku, segði turkiski forsetin í gjár.
##med2##
