Fiskivinna
Upsafiskiskapurin hjá ísfiskatrolarunum, sum royna undir Føroyum, hevur verið góður seinastu dagarnar. Soleiðis hevur í hvussu er verið hjá nøkrum av skipunum, sum leggja veiðina upp í Klaksvík
Fullfermd skip
Mánadagin landaðu fýra trolarar í Klaksvík, og allir høvdu fingið uppí eftir at hava roynt í umleið eina viku.
Navarin og Borgarin høvdu umleið 400.000 pund. Av veiðini var 20.000 pund hýsa, restin var upsi.
Safir og Smaragd, sum eisini landaðu í Klaksvík í mánadagin, høvdu umleið 280.000 pund, og hjá teimum var at kalla øll veiðan upsi.
Trol og gørn
Í gjár var eingin landing í Klaksvík, men seinni í hesi vikuni vænta tey ísfiskatrolararnar Fjalshamar og Nónhamar, sum tá hava verið úti í umleið eina viku.
Pól Fuglø, landingarformaður, sigur, at Ågot, sum roynir við svartkalvagørnum, helst eisini kemur inn at landa hósdagin ella fríggjadagin.
