Ein annar fólkatingslimurur fer nú úr Borgernes parti, sum síðani fólkatingsvalið 24. mars er farin úr fýra niður í tveir limir í fólkatinginum.
Í dag boðaði Emilie Schytte formanninum í flokkinum, Lars Boje Mathiesen, frá, at hon tekur seg "fullkomiliga" úr Borgernes parti.
Hetta skrivaði hon í einum uppslagi á Facebook.
– Tað er ein týðandi avgerð. Tí havi eg tikið mær langa tíð uppá at taka avgerðina, tí eg mátti royna alt eg kundi fyri at fáa hana at rigga.
– Men eg kann ikki longur góðtaka tann retorikkin, sum flokkurin brúkar - og sum Lars millum annað verjir.
Emilie Schytte skrivar, at hon "stólaði blint uppá" Lars Boje Mathiesen.
– Men tað, sum varð lagt fram sum gjøgnumskygni, erligheit og ein uppgerð við valdsmiðsavnan, vísir seg í roynd og veru at vera ein pyramiduskipan av hyklaríi og valdsfullkomileika. Alt tað, sum eg stríðist ímóti. Hví kundi eg ikki síggja tað áðrenn?
– Veruleikin er, at ein organisatión er bygd upp, har veruliga valdið liggur á einum stað. Tað er einki høvuðsborð. Ongin limur við veruligari ávirkan. Lógirnar eru loyniligar. Og tað eru so nógv "reyð fløgg", at tað ikki kann rúmast í einum innleggi, skrivar hon.
Fyri stuttum skrivaði Radio IIII, at Emilie Schytte hevði latið eitt ófullkomið CV á heimasíðuni hjá Borgernes parti.
Sambært miðlinum stendur, at hon var "lærari í vitlíki" á Roskilde universiteti (RUC) frá 2022 til 2024.
Hetta er tó ikki rætt sambært universitetinum, sum hevur upplýst fyri Radio IIII, at "hon varð sett í starv sum undirvísari", sum er hjálparlærari, á skeiði í tríggjar mánaðir.
Hon viðger ikki hetta málið í sínum Facebook-uppslagi í kvøld.
Emilie Schytte sigur ikki beinleiðis, um hon heldur fram sum leysgangari. Men hon skrivar, at "tað einasta, sum hevur týdning fyri meg, er at bera úrslit til fólkið".
– Tí gleði eg meg til tað veruliga arbeiðið kemur í gongd, soleiðis at vit loksins kunnu fáa so nógv vald aftur til borgararnar sum gjørligt.
Seinasta vikuskifti varð Jacob Harris, sum eisini hevði verið valdur fyri Borgernes parti, útihýstur úr flokkinum.
Sostatt er tingbólkurin hjá flokkinum nú bert mannaður við Lars Boje Mathiesen og Nadju Natalie Isaksen.
Ritzau roynir at fáa eina viðmerking frá Lars Boje Mathiesen.
Emilie Schytte vil ikki gera samrøðu við TV 2. Men hon sigur í stuttari fráboðan til fjølmiðlarnar, at "valdið skal venda aftur til borgararnar, og tað fer ikki at henda við Lars á odda".
/Ritzau/
