Í vikuni hava fleiri av teimum, sum eru arbeiðsleys í Føroyum, fingið eitt bræv frá ALS. Í brævinum hava tey fingið at vita, at teirra frítíðarløn verður mótroknað arbeiðsloysisstuðlinum.
Arbeiðssloysisstuðulin verður harvið skerdur, soleiðis at tey fáa minni útgoldið, tí tey fyrst í mai hava fingið frítíðarløn. Tað vil siga, at tey ikki fáa nakað serligt burturúr sínari frítíðarløn.
– Arbeiðsloysisskipanin fremur hesa skerjing við heimild í kunngerð um útgjald av arbeiðsloysisstuðuli frá 26. november 1999, við seinni broytingum, sigur ALS.
ALS sigur eisini við tey, sum hava móttikið brævið, at tey hava rætt til feriu.
– Treytin er, at tú boðar okkum frá tínum ynski um frítíð minst 7 dagar áðrenn frítíðin byrjar, skrivar ALS í brævi.
Hetta er ikki galdandi fyri tey, ið eru komin í korona-skipaninina hjá ALS. Hesi fáa sína vanligu frítíðarløn útgoldna, uttan at hon verður mótroknað ALS-útgjaldinum.
