Fróðskaparsetrið víðkar virksemið á heilsuøkinum

Ingolf S. Olsen

Nýggju samstarvsavtalurnar við Landssjúkrahúsið og Deildina fyri Arbeiðs- og Al­man­na­heilsu samsvara væl við ambisjónirnar á Fróð­skap­ar­setrinum, ið er farið undir at víð­ka virk­sem­ið innan gransk­ing og útbúgving á heilsu­øki­num.
Eitt nú er um­sókn­ar­freistin úti í dag at søkja tvey vísindastørv inn­an sjúkrarøktarfrøði á Fróð­skaparsetrinum – á lekt­ara- ella adjunktstigi, alt eftir hvussu fakliga væl skikk­að­ir umsøkjararnir eru. Og herfyri var eisini lýst eftir einum vísindafólki í heilsu­vís­ind­um á professara- ella lektara­stigi.
- Vit ynskja eitt tætt­ari samstarv við Lands­sjúkra­húsið, millum annað við­víkj­andi útbúgvingini til sjúkra­røktarfrøðing. Vit hava jú frammanundan samstarv um tey sjúkr­a­røkt­­ar­­frøðilesandi, sum øll taka kliniska partin av út­búgv­ingini á millum annað Lands­sjúkrahúsinum, sigur Sigurð í Jákupsstovu, rektari á Fróð­skaparsetrinum.
Hann heldur tað eisini vera ein týdningarmiklan part av avtaluni, at lagt verð­ur upp til, at gransking á báðum stovnunum kann verða knýtt saman, soleiðis at part­arnir bjóða hvør øðrum við í granskingarverkætlanir og minnast til at kunna hin part­in, tá gransking fer í gongd.
- Í granskingarhøpi eiga vit at leggja okkum eft­ir at sam­starva breitt á heilsu­øki­num, sigur rektarin.

Læknavísindi
Men ambisjónirnar røk­ka longur enn til grans­k­ing­ar­sam­starv og at økja talið av sjúkra­røktarfrøðilesandi. Um­framt fleiri onnur sam­størv í avtaluni, snýr ein partur av henni seg um at kanna og lýsa, hvussu ein grund­útbúgving í lækna­vís­indum kann skipast í Føroyum, og hvussu fram­halds­út­búgvingin kann tryggj­ast í samstarvi við út­lendsk universitet.
- Ja enn eru tankarnir við-víkjandi læknavísindaligu grund­út­búgvingini á byrjan­­ar­­stigi, men teir eru grundaðir á, at tað er ein vaks­andi áhugi millum fólk, ið ynskja at lesa innan heilsu­øk­ið, sigur Sigurð í Jákups­stovu.

Bachelor ella minni
Um grundútbúgvingin í lækna­vís­ind­um verður veruleiki, er tað tó enn óvist, um talan verður um eina bachelor-útbúgving ella eina út­búgv­ing á eitt sindur lægri stigi.
- Skulu vit bjóða eina slíka grund­útbúgving, mugu vit gera eina samstarvsavtalu við onnur universitet um at taka ímóti okkara lesandi til framhaldslesturin, sigur Sigurð í Jákupsstovu.