Í øllum førum um vit skulu trúgva teimmum flokkum, sum bjóða seg fram. Og tað er ikki hvørs um helst, sum lovar skattalætta: Flokkarnir hjá fíggjarmálaráðharranum og formanninum í fíggjarnevndini ganga á odda.
Tað var longu greitt frammanundan, at valið varð skrivað út, at búskaparpolitikkurin fór at seta sín dám á valstríðið hesaferð. Soleiðis varð.
Javnaðarflokkurin var fyrstur at melda út við sínum skattauppskoti – ella skattaumlegging, sum flokkurin kallar tað. Endamálið er at lækka skattatrýstið á inntøku og at lætta um hjá teimum veikaru.
Næstur var Fólkaflokkurin við uppskotinum um flatskatt. Hetta er sama uppskot, sum Bjarni Djurholm legði fyri tingið beint eftir ólavsøku, sum tá kallaðist flat-tax. Endamálið er tað sama, sigur Fólkaflokkurin.
Javnaðarflokkurin sigur, at teirra uppskot er væl og virðiliga gjøgnumhugsað – og at Taks hevur gjøgnumroknað og váttað, at tølini eru røtt. Fólkaflokkurin hevur ikki gjørt slíkar útrokningar, men hann sigur, at øll skulu gjalda minni í skatti, og harvið kemur meira inn í skatti, tí tá øll gjalda minni, so fara tey at arbeiða meira og harvið rinda meira í skatti. Eitt bjart politiskt mál, men neyvan er gjørligt at gjøgnumrokna tað.
Framsókn legði í morgun fram sín politikk, sum eisini fatar um skattalækking. Framsókn sigur, at vit skulu hava »kappingarføran skatt«. Longu komandi ár skal skattalætti setast í verk, fyri at gera Føroyar kappingarførar við grannalondini.
Í 2014 skal skattaprosentið setast til 43 prosent hjá øllum við einum botnfrádátti upp á 70.000. Hetta minnir ikki sørt um uppskotið hjá Fólkaflokkinum.
Framsókn sigur, at við teirra uppskot skulu eini hjún, sum vinna tilsamans umleið 50.000 krónur um mánaðin, fáa ein lætta upp á 2.100 krónur.
Vit hava soleiðis tríggjar flokkar, sum hava hvørt sítt konkret uppskot um, hvussu vit lætta inntøkuskattin, so spennandi verður at síggja, hvussu leikur fer!
