Nú um vikuskiftið verður ein forkunnug bók løgd fram. Tað er Paulina M.K. Eliasen, sum hevur skrivað bókina, Brodering til tann føroyska tjóðbúnan 2.
Og klokkan 14 leygardagin verður bókin løgd fram í Havn í hølunum hjá Tórshavnar Kvøldskúla í A.C. Evensensgøtu, og sunnudagin klokkan 15 verður hon løgd fram í Klaksvík í Skúlanum á Skúlatrøð.
Tað er ikki gamalt at brodera fyriklæði og turriklæði til føroysk klæðir, men frá í fimmtiárunum tók brodering rættiligt dik á seg og breiddi seg um alt landið.
Í 2013 gav Mentunargrunnur Studentafelagsins út bókina, Brodering til tann føroyska tjóðbúnan, sum bæði var á føroyskum og á enskum. Og nú gevur Mentunargrunnurin bókina, Brodering til tann føroyska tjóðbúnan 2, út.
Henda bókin er ein væl størri bók enn tann fyrra bókin, sigur Mentunargrunnur Studentafelagsins í tíðindaskrivi. Øll bókin er skrýdd við litmyndum og teksturin er bæði á føroyskum og enskum.
Rithøvundurin hevur í meira enn 30 ár undirvíst í brodering, og serstakliga nógv hevur hon undirvíst í at brodera til føroysk klæðir.
– Eins og í fyrru bókini sigur hon frá, hvussu hon broderar, og eitt, hon vísir við myndum, er, hvussu sama mynstur fær ymiska útsjónd við ymsum litum.
Paulina M.K. Eliasen vísir á, at vit í Føroyum eru heppin at hava ein tjóðbúna, tí so eru vit altíð klár at lata okkum í tá ið hátíðardagur er.
