Síðani aldursskiftið eru føroyskir tónleikafestivalar vorðnir so mikið vanligir, at tað mangan verður tikið til, at tað nærum er ein á hvørjum tanga.
Um tað ikki var nokk, so hava føroyingar seinnu árini eisini skipað fyri tónleikafestivalum í Keypmannahavn, og í dag boðar Vinnu- og Uttanríkismálaráðið frá, at ein nýggjur føroyskur festivalur sær dagsins ljós í Russlandi.
Festivalurin, ið Sendistova Føroya í Russland samskipar, hevur fingið heitið “Føroyar eru tættari, enn tú heldur”.
Skipað verður fyri ellivu ymiskum konsertum í 5 ymiskum býum, og er í døgunum frá 21. oktober til 2. november. Tilsamans er talan um 9 tónleikarar, ið spæla við ávikavist Kristian Blak & Yggdrasil, Marius Ziska og Súsannu Herálvsdóttir.
Endamálið við nýggja festivalinum er at gera Føroyar meira kendar millum manna í Russlandi, og eru tað Norðurlandahúsið, Mentanargrunnur Landsins og føroyski mentanarpeningurin hjá Koda, ið hava stuðlað tónleikafestivalinum.
