FM-kappingarnar í borðtennis í ein- og tvímansleiki fyri yngru deildirnar verða sunnudagin, 2. apríl í ítróttarhøllini á Hálsi.
Kappingarnevndin ger vart við, at avgjørt síðsta freist fyri tilmelding er týsdagin 28. mars, og eftir hetta er ikki gjørligt at melda til. Lutakast verður nevnliga týskvøldið, og tá verður kappingin eisini løgd til rættis.
Kappingarnevndin sigur víðari, at raðlistarnir frá Grand Prix-kappingunum í vetur verða nýttir at styrkismeta - seeda - leikararnar.
Favorittarnir
Stórur spenningur verður væntandi í fleiri deildum, hvør verður føroyameistari. Tí hóast greiðir vinnarar hava verið í Grand Prix-kappingunum í nøkrum deildum, so er her talan um FM - og nógv stendur á leikarunum. Tí stórur heiður er sjálvandi í tí at gerast føroyameistari.
Tó kunnu vit nevna nøkur nøvn, sum óivað fara at gera vart við seg sunnudagin.
Hjá pinkunum hevur Rakul V.Magnussen úr Streymi vunnið allar kappingarnar í vetur, og spennandi verður so at síggja, um hon eisini megnar at vinna FM-heitið.
Eisini Brian Hansen hjá piltunum verður tungur at syfta. Hann er eisini úr Streymi.
Rókur Nielsen úr TÓR og Elisa Abrahamsen úr Streymi eru óivað favorittar hjá ávikavist Smádreingjum og Smágentum.
Alt kann broytast
Eitt annað, sum fyrr hevur víst seg er, at yngru leikararnir ofta vinna eldri deildir eisini. Í FM-kappingini í borðtennis er tað nevnliga so, at um ein leikari gerst millum 4 teir fremstu í einmansleiki ella 2 teir fremstu í tvímansleiki, so hevur hann vunnið sær rætt at spæla við í næstu deild eldri enn hansara egnu. Og fleiri ferðir hava t.d. piltar vunnið FM-heitið í Smádreingjadeildini. Hetta má so eisini bera boð um, at skipanin er góð - og verd at varðveita.
Kappingarnevndin í Borðtennissambandinum sigur at enda, at FM fyri eldru deildirnar verður í Tórshavn leygardagin 8. apríl.
