Bæði hjá ÍF og EB/Streymi eru tað spælarar, sum av ymsum orsøkum ikki hava møguleika at vera í finaluni í kvøld.
Hjá ÍF er Karl Løkin leikbannaður. Ætlanin var, at Øssur Dalbúð, sum í fjør var toppskjútti hjá ÍF, skuldi hjálpa til í álopinum í kvøld. Øssur kom heim úr Danmark um mánaðarskiftið juni/juli, men hann hevur ongan dystin spælt, síðani hann kom heim.
Í fyrstu venjingini var Øssur so óheppin at bróta eitt bein í fótinum. Tær fyrstu vikurnar eftir óhepnu hendingina varð vónað, at Øssur skuldi verða klárur at spæla í kvøld, men so er ikki. Øssur hevur gingið á høkjum síðani tá. Í hesi vikuni fekk hann frá læknanum boð um, at hann skal ganga á høkjum í tvær vikur aftrat, og tí fara tað ivaleyst at ganga einir tveir mánaðir, áðrenn málsókni spælarin verður førur fyri at spæla.
Hjá EB/Streymi kemur tað illa við, at sera skilagóði sentrali miðvallarin Pauli G. Hansen er so mikið skaddur, at hann ikki er førur fyri at spæla íkvøld.
