Seinasta samdøgrið hevur verið friðarligt hjá løgregluni. Átøkini kring skúlar halda fram, har løgreglan roynir at vera til staðar í eini trimum til fýra skúlum um dagin.
Í gjár var løgreglan við skúlan á Toftum, á Skála, við Sankta Frans skúla og Lítla skúla í Havn.
– Og tað sá hampuligt út, sigur Jóannes Østerø, vaktleiðari hjá løgregluni.
Við skúlarnar hyggur løgreglan serliga eftir, um børnini sita íbundin, sum tey skulu.
– Vit royna ikki at ræða børnini, men royna at fáa prát í lagi, um viðurskiftini ikki eru heilt, sum tey skulu. Og eru tað meira grell brot, so mugu vit sjálvandi skriva tey fyri tað, sigur hann.
Á Skála er eina 30 km sona við skúla, og tað vóru tað nøkur foreldur, sum koyrdu ov skjótt har, og tað fingu tey so líka eina átalu fyri.
Hesi átøkini hjá løgregluni halda fram einar tvær vikur afturat, løgreglan roynir at koma runt til allar skúla, og tekur einar tríggjar til fýra skúlar um dagin.
