Vinnararnir í teimum báðum seinnu hálvfinalunum týskvøldið í steypakappingini, EB/Streymur og ÍF, møtast við Margáir í annaðkvøld klokkan 19, so báðar manningarnar byrja dystin í besta hýri, sum vikan hevur lagað seg hjá teimum.
Hjá EB/Streymi er Hans Pauli Samuelsen framvegis skaddur, eftir at hann í fyrra dystinum ímóti B36 fekk eina takling niður á økilin. Og uppaftur harðari er lagnan við Alex José dos Santos, sum í fýra mánaðir noyðist at halda seg burturi frá fótbólti, til óstbeinið er komið ordiliga upp á pláss aftur.
– Vit eru rímiliga væl fyri til dystin. Og burtur sæð frá Hans Paula og Santos, so eru allir tøkir til dystin ímóti fuglfirðingum. Hetta er stevnudystur, so tað hevur nógv at siga fyri okkum, at vit fáa ein góðan dyst. Vinna vit, so eru vit ordiliga við aftur, sigur Heðin Askham, venjari hjá EB/Streymi.
ÍF fær hesa ferð Kaj Ennigarð við aftur, eftir at hann hevði karantenu týskvøldið, tá eisini Høgni Zachariassen aftur var á liðnum eftir skaðasteðg. Pól Ennigarð situr uttanfyri við karantenu ein dyst aftrat, og enn er heldur einki at síggja til Rógva Jacobsen, sum framvegis er skaddur.
– Vit hugsa heldur ikki so nógv um, at hetta er eitt slag av forpremieru undan steypafinaluni, men hinvegin vænti eg sjálvandi, at eg eri nakað klókari eftir dystin, um vit hugsa eitt sindur longur fram við fyrireikingunum. Nú taptu vit á heimavølli síðst, so hjá okkum ræður um at reisast aftur, sigur Abraham Løkin, venjari hjá ÍF.
Fyrru ferð, liðini hittust, var í Fuglafirði fyri góðum tveimum mánaðum síðani, og tá endaði tað við javnleiki 1-1. Tað ferðina kom EB/Streymur á odda 1-0 stutt inn í seinna hálvleik, men ímóti endanum eydnaðist ÍF at fáa javnleik
