##med2##
Prísirnir fyri at koyra ígjøgnum Sandoyartunnilin verða teir somu, sum tað kostar at koyra millum Eysturoynna og Streymoynna í dag – og við júst somu avsláttarskipanum.
Tað sigur Teitur Samuelsen, stjóri í P/F Eystur-og Sandoyartunlar, í samrøðu við Árna Gregersen á FM1 á miðdegi í dag.
Men, fer tað at broyta nakað upp á inntøkugrundarlagið, at Sandoyartunnilin letur upp seinni í ár?
- Hetta er alt eitt samlað lán, og tá alt varð sett saman, høvdu vit longu roknað við nøkrum inntøkum í Sandoyartunlinum. Soleiðis broytir hetta ikki upp á nakað, um inntøkurnar annars fara at svara til tær metingar, sum eru gjørdar.
Teitur Samuelsen sigur, at inntøkurnar frá Sandoyartunlinum væntandi fara at liggja um einar 10-11 miljónir krónur um árið.
Spurdur, hvussu tað annars sær út við inntøkugrundarlagnum í løtuni, sigur Teitur Samuelsen soleiðis:
- Tað sær gott út við ferðslu, men inntøkurnar fylgja ikki ordiliga við.
Tunnilsstjórin vísir á, at tað hevur verið rættiliga stór øking í ferðsluni í Eysturoyartunlinum í januar mánaði í ár í mun til januar í fjør.
- Økingin í januar í ár er næstan 20 prosent í mun til januar í fjør, men eg kann leggja aftrat, at í januar í fjør var ein stór útbreiðsla av koronu í Føroyum.
Tunnilsstjórin vísir á, at meðan vøksturin í ferðsluni í januar í ár er út við 20 prosent, er vøksturin í inntøkunum í sama tíðarskeiði minni enn 10 prosent.
- Tað eru avsláttarskipaninar, sum gera, at inntøkurnar ikki standa mát við øktu ferðsluna, leggur Teitur Samuelsen aftrat.
Øll samrøðan, sum Árni Gregersen hevði við stjóran í P/F Eystur-og Sandoyartunlar á FM1 á miðdegi í dag, kann hoyrast við at trýsta á pílin undir myndini.
