Útlendskir miðlar vita í morgun at siga, at eitt farmaskip - M/V Glory - hevur tikið í botn í Sues-veitini.
Tíðindastovurnar, Reuters og Associated Press, eru millum miðlarnar, sum bera hesi tíðindi í morgun.
Sambært bjargingarfelagnum, Leth Agencies, fór hendingin fram, tá skipið skuldi gerast partur av einum skipafylgi.
Skipafylgið var á veg suður ígjøgnum Sues-veitina, og M/V Glory tók í botn nærindis egyptiska havnarbýnum, El-Qantarah.
Sambært Reuters og Associated Press er ikki greitt, um M/V Glory órógvar skipaferðsluna í Sues-veitini í løtuni.
- Sleipibátar royna nú at fáa skipið av aftur, har tað stendur, verður lagt aftrat.
Dagført:
Seinni í morgun frættist, at skipið er komið av aftur, og at tað bert eru smærri seinkingar í samband við hendingina.
Sagt verður, at M/V Glory er skrásett á Marshall-oyggjunum, og sambært Associated Press var skipið á veg úr Ukraina til Kina við 65.000 tonsum av mais.
