Fyri einari viku síðani var ungi Manchester United leikarin, Marcus Rashford, eitt fullkomiliga óskrivað blað fyri tey allar flestu fótbóltsáhugaðu.
Men í dag eina viku seinni, kennast tey flestu við unga áleyparan. Marcus Rashford, sum hóskvøldið spældi sín fyrsta dyst fyri Manchester United. Hann skoraði tá tvey mál ímóti FC Midtjylland, og skoraði aftur sunnudagin tá Manchester United spældi móti Arsenal, tvey mál.
Góðu avrikini á vøllinum seinastu vikuna, løna seg nú uttan fyri vøllin. Bretskir miðlar skriva í dag at Marcus Rashford hevur fingið bjóðað nýggjan sáttmála frá Manchester United, sum ikki verður færri enn 20-faldaður í mun til tann undanfarna.
Marcus Rashford sum hevur forvunnið góðar 10.000,- krónur um vikuna í tí undanfarna sáttmálanum, kemur nú at fáa góðar 200.000,- krónur um vikuna.
Tað stendur einki um enn, hvussu langur nýggi sáttmálin millum Marcus Rashford og Manchester United fer at vera.
