Føroysk Miðlafólk, ið er fakfelagið hjá føroyskum miðlafólkum, varð á fundi í Brussel ígjár tikin upp sum limur í International Federation of Journalists (IFJ).
- Ágangurin á journalistar og journalistiska fakið økist alsamt, bæði úti í heimi, og eisini her heima í Føroyum. Tí meta vit tað vera neyðugt, at vit gerast limir í IFJ, har vit fáa neyðuga stuðulin til at stríðast fyri okkara rættindum. Og Føroysk Miðlafólk fara eisini at stuðla tí arbeiði, sum IFJ ger fyri at hjálpa journalistum, ið stríðast fyri sínum rættindum, sigur Anna V. Ellingsgaard, forkvinna í Føroysk Miðlafólk.
Fyri knøppum mánaði síðani sendi Føroysk Miðlafólk umsókn um limaskap í IFJ, og hetta gekk skjótari enn tey kundu væntað sær.
- Men við hollum stuðli frá okkara norðurlendsku systurfelagsskapum, serliga Norsk Journalistlag, fingu vit umsóknina við á dagskránna á fundinum hjá IFJ um vikuskifti, sigur hon.
Føroysk Miðlafólk hava í nógv ár havt tætt samstarv við norðurlendsku miðlafakfeløgini gjøgnum Nordisk Journalistforening. Hetta hevur verið eitt samstarv, har FM hevur fingið dyggan fakligan stuðul til sítt arbeiði.
Nú eru felagið eisini farið upp í altjóða felagsskapin fyri journalistar, IFJ.
