Jacob Vestergaard brúkti dagarnar undan jólum ikki nógva tíð upp á at keypa jólagávur, tí tær flestu tók konan sær av. Tó keypti hann onkra jólagávu sjálvur.
- Vit hildu jólaaftan hjá soninum Jan, sum býr í Hoyvík. Tá ótu vit dunnu, og í dag – jóladag - hava vit etið gás.
Jacob Vestergaard sigur, at um jólini verður eisini ræst kjøt etið, og veðrariv verða koyrd í ovnin.
- Í dag eru vit farin suður á Akrar aftur, og her verða vit tað, ið eftir er av jólahøgtíðini, sigur løgtingsmaðurin.
Men, hvussu hevur hetta árið so roynst hjá Jacobi Vestergaard?
- Fyri meg hevur hetta verið eitt friðaligt ár, uttan tær stóru persónligu hendingarnar, hvørki positivar ella negativar.
Og hvørjar eru so vónirnar fyri 2019?
- Tað verður løgtingsval í 2019, og vónandi fáa vit eitt nýtt stýrið, tí tað hava Føroyar brúk fyri, sigur Jacob Vestergaard, løgtingsmaður.
