FJM
Maskinverkstaðurin, FJM í Runavík, húsast í bygninginum, sum Eysturoyar Heilsøla áður átti. Bygningurin er rúmligur við sínum 2450 fermetrum umframt skrivstovum, matarhøll og øðrum hølum í ovaru hæddini. Pláss er fyri øllum virkseminum hjá felagnum í hesum bygninginum, sum felagið í dag eigur.
Frithleif Olsen, stjóri á FJM, sigur, at tað er nógv arbeiðsligari hjá felagnum, nú alt virksemið er á einum staði, og somuleiðis er tað ein stórur fyrimunur, at bygningurin liggur við havnalagið.
Serkunnleiki
Styrkin hjá maskinverkstaðnum, sigur Frithleif, er, at felagið hevur útvegað sær serkunnleika innan framleiðslu av útgerð til fiski-og alivinnuna.
- Hetta hava fleiri fiskavirkir, flakatrolarar, rækjutrolarar, alivinnan og onnur fingið ágóðan av.
FJM hevur allar teir hentleikar, sum krevjast á eini nútímans verksmiðju.
- Við hollum royndum innan menning og framleiðslu av eitt nú matvøruframleiðslutólum er felagið ført fyri at veita heildarloysnir ? heilt frá tekniborði til veruleika, sigur Frithleif.
Skjót tænasta
Hann sigur, at við landsins størstu goymslu av rustfríum stáli, roynir felagið altíð at veita viðskiftafólki tær vørur og tænastur, ið krevjast ? og hetta verður gjørt á skjótasta hátt.
- Vit vita, hvussu umráðandi tað er hjá viðskiftafólkum okkara altíð at fáa eina álítandi, skjóta og góða tænastu ? ikki minst, tá ið talan er um framleiðsluvinnuna, sigur Frithleif Olsen.
Teir, sum í dag eiga maskinverkstaðin, FJM í Runavík, eru Frithleif Olsen, Jóhan Hendrik Olsen, Petur Jacob Petersen og Arni Carlsen.
