Hann er týðuliga firtin um, at Sosialurin í oddagreinum hevur funnist at honum og víst á ymsar skeivleikar í førda politikkinum hjá landsstýrinum í mun til tað, sum Sambandsflokkurin lovaði undan valinum. Hann roynir á Facebook at gera tað til, at okkurt er galið við blaðstjóranum – at »fleiri fólk hava spurt hann, eisini blaðfólk á Sosialinum...«
Harumframt kennir løgmaður seg eisini úthongdan og niðurgjørdan.
– Nú kann løgmaður føla tað, hann vil. Men er okkurt galið við blaðstjóranum á Sosialinum, tá hann finst at løgmanni, so er kanska eisini okkurt galið við Edmundi Joensen, fólkatingsmanni, og Annfinni Brekkstein, býráðslimi í Havn, tí teir føra fram júst tað sama.
Vit kunnu taka nøkur dømi úr kritikkinum hjá Edmundi Joensen móti løgmanni og Sambandsflokkinum:
- Tann sosial-liberala stenan er kámað burtur
- Flokkurin eltir víðgongda høgra-liberalistiska rás
- Sjónligur munur er tí, sum flokkurin segði áðrenn valið og tí, sum flokkurin hevur gjørt eftir valið
- At skatta pensjónir við inngjaldi er inntriv í persónliga frælsi
- Sambandsflokkurin átti at spola aftur til gomlu skipanina við pensjónsskatting
- Skattapolitikkurin hjá samgonguni gongur ímóti sosial-liberalu stevnu Sambandsfloksins
- Tilfeingisgjald er ein sjálvfylgja – sum eigur at vera eitt kabinettmál fyri Sambandsflokkin
- Passar ikki at »veljarin valdi borgarligt«, tað er ein sannleiki við modifikatiónum
Og Annfinn Brekkstein sigur m. a.:
- Fólkaflokkurin stýrir einsamallur fiskivinnu og fíggjarmálum
- Fólkaflokkurin trumfaði flatskattin ígjøgnum
- Fólkaflokkurin fekk Sambandsflokkin at skatta pensjónir við inngjaldi
- Samgongan ger enda á fiskivinnupolitikkinum, sum Sambandsflokkurin gjørdi fyri valið
- Samgongan vil forera tilfeingi til nøkur fá
- Fólkaflokkurin roynir lumpa og lirka við rullandi loyvunum
- Fólkaflokkurin vil taka ognarrættin til fiskiríkidømi frá Føroya Fólki
- Sambandsflokkurin fær ein trúvirðistrupulleika at dragast við í nógv ár, sum hann ikki broytir kós.
Niðurstøðan hjá Annfinni Brekkstein er, at tað verður til óbótaligan skaða, og bartút sagt ein politisk vanlukka, um Sambandsflokkurin bara í minsta mun verður identifiseraður við henda hugsjónarleysa, antiliberala politikkin hjá Fólkaflokkinum.
Løgmaður hevur fyrr sagt, at tað verður ikki góðtikið, at partamenn hansara »ikki ganga í takt«. Spurningurin er so, hvat løgmaður ger við fólkatingsmannin og býráðslimin. Kanska okkurt er galið við teimum? Ella er tað so livandi galið, at at okkurt er bagir løgmanni sjálvum?
