Kappingin er í Budva í Montenegro. 38 lond eru við. Av smátjóðunum í Evropa eru Føroyar einsamallar millum tey stóru. Einki av hinum níggju liðunum í smálandakappingini, sum júst hevur verið í Jersey, er við í EM-kappingini.
Hetta er triðja ferðin, at Føroyar eru við. Fyrsta ferðin var í 2015. Tá var telvað í Íslandi. Talvsambandið setti tá sum treyt, at vóru fimm teir fremstu av okkara telvarum til dystin fúsir, so varð meldað til. Sama var í 2017. Báðar ferðir mannaðu somu fimm telvarar føroyska liðið.
Úrslitini vóru nøktandi. Vit hildu okkara styrkismeting báðar ferðir. Tá eydnaðist at fáa góð úrslit móti okkara javnlíkum, og í teimum torføru dystunum hepnaðist eftir umstøðunum væl í fleiri førum. Eitt av bestu einstøku dystarúrslitunum var 2-2 javnleikurin móti Danmark í Laugardalshøllini í 2015. Helgi og Rógvi vunnu á 1.- og 4. borði. Tað fløvaði sum vera man - ikki minst at Helgi koppaði sterkasta danska telvaranum, Sune Berg Hansen.
Eingin Helgi
Og nettupp tað, at føroyski stórmeistarin, Helgi Dam Ziska, ikki er við hesaferð, ger, at nógv stendur á okkara telvarum.
Helgi var ein tryggur brimgarður í dystum móti so sterkum liðum, sum kappast í EM. Á Kreta í 2017 var Helgi ósigraður á 1. borði í sjey dystum. Millum mótstøðuliðini vóru so frægar talvtjóðir sum Spania og Norra - Magnus Carlsen var tó ikki á 1. borði tann dagin. Helgi hevði 2618 í ratingavriki á Kreta í 2017.
Í 2015 endaðu Føroyar nummar 34 av 36 liðum, og í 2017 vóru vit nummar 36 av 40 liðum. Úrtøkan hjá okkara monnum var henda:
EM 2015 (Reykjavík)
Føroyar 34 (36)
1. IM Helgi Dam Ziska 4½/8
2. IM John Rødgaard 1½/7
3. FM Høgni Egilstoft Nielsen 2/7
4. FM Rógvi Egilstoft 4/8
5. IM John Arni Nilssen 1/6
EM 2017 (Kreta)
Føroyar 36/40
1. GM Helgi Dam Ziska 4½/7
2. FM Høgni Egilstoft Nielsen 3½/9
3. FM Rógvi Egilstoft 4½/8
4. IM John Rødgaard ½/6
5. IM John Arni Nilssen 1½/6
Móti Grikkalandi
Í fyrsta umfari í dag telva Føroyar móti Grikkalandi, sum er styrkismett nummar seytjan. Teir hava stórmeistarar á øllum borðum.
Eitt hálvt stig í dag hevði verið kærkomið.
Til ber at fylgja við leik fyri leik á netinum. Eitt mið er heimasíðan chess24.com. Talvsamband Føroya fer helst at leggja leinki út.
Fyrstu leikirnir verða fluttir klokkan 14 í dag. Hesir telva í dag í dystinum millum Føroyar og Grikkaland:
##med2##
