U?19 LANDSLIÐIÐ
Tað er eingin loyna, at tað skal drúgvt arbeiði og nógv stríð til at ala fótbóltsspælarar. Hetta eru royndirnar í feløgunum, og hetta eru eisini royndirnar á yngru landsliðunum. Spælarar fella frá, tí teir verða skaddir, ella tí teir missa hugin og tískil vilja ikki halda fram at leggja so nógv í venjingina, sum teir hava gjørt.
Í gjár fór U?19 landsliðið av landinum. Talan er um síðstu fótbóltsferðina hjá føroyingum í hesum árinum. Landsliðið skal luttaka í EM undankapping í Slovenia. Mótstøðuliðini eru Skotland, Slovenia og Grikkaland.
Góð evni
Jógvan Martin Olsen, sum leygardagin kom aftur at U?17 landsliðsferð í Sveis, er venjari hjá U?19 landsliðnum. Um hetta er síðsta ferðin hjá honum í hesum umfarinum saman við einum landsliði er ikki greitt enn, men tað er greitt, at hann fer ikki at halda fram at samstarvast við Fótbóltssambandið á sama hátt, sum hann hevur gjørt hesi seinastu árini, tá hann hevur verið hjálparvenjari hjá Allani Simonsen, venjari hjá U?19 landsliðnum og høvuðsábyrgdarmaður fyri hinum yngru landsliðunum.
Tað eru átjan spælarar í ferðalagnum, sum er farið til Slovenia. 1983 árgangurin hevur leingi verið mettur sum ein tann besti av føroyskum fótbóltsspælarum.
? Í 1999 stóð hetta liðið seg sera væl. Í NM kappingini fyri U?17 landslið megnaðu teir málleysan javnleik ímóti Danmark, og teir taptu tepurt 2?1 ímóti Íslandi. Hevði tað gingið eftir ætlanini, so høvdu somu spælararnir nú luttikið í síðstu kappingini fyri U?19 landslið. Men vit mugu staðfesta, at nógvir av teimum eru ikki við longur, sigur Jógvan Martin Olsen.
Árgangurin nógv minkaður
Venjarin sipar m. a. til verjuna, sum var við fyri tveimum árum síðani. Hon sá soleiðis út: Arnold Berg, Skáli, Kristian á Lakjuni, KÍ, Vagnur Mohr Mortensen, HB, Elfinn Ørvarodd, FS Vágar. Eingin av hesum spælarunum er í ferðalagnum í Slovenia. Arnold hevur havt betri hug til hondbóltin síðsta árið, Kristian er givin, Vagnur hevur síðani í summar verið plágaður av skaða í lærkrikanum, og nú er hann eisini skaddur í rygginum, og Elfinn hevur verið til skips, og hann er nú farin avstað aftur.
Fróði Jóanesarson var álopsmaður, men hann hevur ikki gjørt so nógv við venjingina síðsta árið. Atli Danielsen, Jón Rói Jacobsen og Símun Joensen eru við í Slovenia, men teir kundu allir havt verið betri fyri. Atli og Jón Rói hava síðsta mánaðin verið so mikið plágaðir av skaðum, at teir ikki hava fingið vant við fullari ferð, og Símun Joensen er komin beinleiðis úr USA og til Slovenia. Har, sum hann er í USA, ber ikki til at spæla fótbólt á tí støðinum, sum landsliðsspælarar helst skulu venja og spæla á. Símun hevur luttikið í nógvum ítrótti, og hann hevur vant við bólti, men tað ber illa til hjá honum at vera í dystarvenjingini, sum hann var í, tá hann fyrst í august fór avstað.
? Vit hava havt fleiri av næsta árganginum at hjálpa til, men har hava teir eisini verið óhepnir, sigur Jógvan Martin Olsen.
Í tí sambandinum sipar hann m. a. til Inga Højsted í Arsenal, sum ikki enn er komin seg so mikið eftir beinbrotið, at hann kundi fara við til Slovenia.
Ætlanin var, at Rasmus Nolsøe úr TB skuldi fara við, men hann varð skaddur í síðstu viku, tá U?17 landsliðið var í Sveis. Ein annar av yngra árganginum, sum hevur sýnt sera góð evni, er Rani D. Christiansen. Í fjør fekk hann trupulleikar við krossbandinum. Hann hevur ikki spælt í ár, men tað gongur rætta vegin hjá honum.
Nýggir taka við avbjóðingini
At so nógvir av ymiskum orsøkum ikki eru tøkir hevur sjálvandi stórt árin í einum so lítlum samfelag sum tí føroyska.
Teir, sum nú eru í Slovenia, eru evnaríkir, men sjálvandi fer tað at kennast aftur, at tað nú eru fleiri, sum eru eitt og tvey ár yngri, enn spælararnir eru á liðunum, sum teir fara at spæla ímóti. Liðið varð úttikið, áðrenn U?17 landsliðið fór til Sveis. Nú Rasmus Nolsøe noyddist at geva avboð, er Eli Thorsteinsson úr HB úttikin í staðin. Saman við liðfelaganum Róki Jespersen er hann á Hesselgods fótbóltsskúlanum, sum Brøndby rekur í Grenå. Talan er um 10. skúlaár við nógvum fótbólti á skránni. Millum lærararnar eru Kent Nielsen og Flemming Povlsen, sum í 1992 vóru við til at vinna EM heitið til Danmarkar.
Spælararnir í føroyska U?19 hópinum eru Pól Næs Joensen, HB, Áki Petersen, ÍF, Atli Danielsen, KÍ, Bárður Christiansen, HB, Bjarni Jørgensen, HB, Jón Rói Jacobsen, HB, Jann Ingi Petersen, B68, Símun Joensen, KÍ, Gilli Haraldsen, Frederikshavn, Heini í Skorini, B36, Hjalgrím Elttør, KÍ, Kári í Lágabø, VB, Bárður Dimon, TB, Eli Thorsteinsson, HB, Áki L. Hansen, NSÍ, Heini Jacobsen, Sumba, Kai Ennigarð, GÍ, og Rókur Jespersen, HB.
Umframt Jógvan Martin Olsen hava Mathias Davidsen og Bill Jacobsen verið heima og vent og skulu nú aftur til Slovenia. Rúni Mohr er liðleiðari, og Øssur Steinhólm er fysioterapeutur.
