Aleksandar Djordjevic verður ikki førur fyri at spæla fótbólt aftur í ár. Leygardagin var hann á 2. deildarliðnum hjá KÍ, sum á heimavølli megnaði at vinna 4-3 ímóti B71, ið annars hevur staðið seg væl.
Aleksandar Djordjevic, sum verður 36 14. juli, noyddist av vøllinum, tí hann var skaddur. Á Klaksvíkar Sjúkrahúsi varð staðfest, at tað er hælsinan, sum er farin. Djordjevic skuldi leggjast undir skurð í gjár. Tað verður roknað við, at tríggir mánaðir í besta føri skulu ganga frá tí, at hælsinan er skurðviðgjørd, og inntil tað kann hugsast um at venja aftur. Tað vil við øðrum orðum siga, at tað í besta føri fer at vera komið fram ímóti kappingarenda, tá ið jugoslavin aftur verður førur fyri at bjóða seg til venjingar.
Djordjevic kom til Klaksvíkar í 2001. Tað var Tomislav Sivic, sum tá var venjari hjá KÍ, ið fekk hann at hjálpa KÍ. Royndi maðurin, sum hevur roynt seg á hægsta støði í Jugoslavia og eisini hevur spælt í Europa Cup, ætlaðist at vera álopsstyrkur hjá KÍ. Seinni hevur hann tó fyri tað mesta spælt í miðverjuni.
Aleksandar Djordjevic hevur higartil skorað seks mál í landskappingini fyri KÍ. Hann skoraði tey øll í 2001. Aleksandar er búsettur í Klaksvík. Hann er giftur við Joan Midjord Joensen, sum nú eitur Joan Midjord Djordjevic. Hon er spælstýrari hjá Stjørnu kvinnunum og man vera ein tann besti kvinnuligi hondbóltsspælarin í landinum.
