Fert tú á ólavsøku?
- Ja, eg fari á ólavsøku.
Hvussu heldur tú ólavsøku í ár?
- Vit gera stórt kalt borð ólavsøkuaftan, og tá plaga familja og vinir at koma á vitjan. Hetta plagar at vera so sera hugnaligt.
Tað sigur Gunnvá Eiriksdóttir.
- Okkum dámar væl at ganga oman og niðan gjøgnum býin á ólavsøku.
Hvat er tað besta við ólavsøkuni?
- Kappróðurin, midnáttarsangurin og tað at hitta fólk, bæði heima og úti, er eftir mínum tykki tað besta við ólavsøkuni.
Gunnvá Eiriksdóttir heldur, at ólavsøkan hevur stóran týdning fyri Føroyar sum tjóð.
- Mær dámar væl tað hátíðarliga, sum er yvir ólavsøkuni – við setanini, skrúðgonguni, gudstænastuni og ymskum øðrum, sum hoyrir ólavsøkuni til.
Er okkurt serligt, tú minnist frá ólavsøkuni?
- Eg minnist nógvar góðar og stuttligar ólavsøkur – ikki minst, tá vit sum børn vóru hjá mostir okkara á Tinghúsvegnum, og vit fóru til nonnurnar at fiska. Tað var eisini sera hugnaligt við ymisku tiltøkunum í kommunuskúlagarðinum, sigur Gunnvá Eiriksdóttir.
