Cody Gakpo er nýggjur í Liverpool

Liverpool kunngjørdi í gjár, at felagið hevur keypt hollendsku HM-stjørnuna Cody Gakpo frá PSV. Prísurin sigst liggja um 300 milliónir krónur í fyrstu atløgu, men kann blíva hægri alt eftir hvussu spælarin og felagið klára seg. Partarnir hava gjørt ein fimm og eitt hálvt ára sáttmála.

Skiftið kemur óvart á, tí Liverpool hevur ikki verið sett stórvegis í samband við 23 ára gamla vongin hjá PSV. Tó kom tað ikki óvat á, tá Liverpool í gjár kunngjørdi keypið, tí dagin fyri váttaði PSV á Twitter, at felagið er komið ásamt við Liverpool, um at selja 23 ára gamla hollendska landsliðsspælaran.

Cody Gakpo, sum hevur verið settur í samband við Manchester United, hevur havt eitt gott kappingarár í PSV, men stóra gjøgnumbrotið kom til HM-endaspælið í Katar. Her skoraði 23 ára gamli vongurin í øllum trimum dystunum í bólkaspælinum.

Cody Gakpo er vinstri vongur, men kann eisini spæla í álopinum ella á høgra vongi. Liverpool keypti í fjør um somu tíð ein annan vinstra vong í Luis Diaz. Hann hevur staðið seg væl, men ein knæskaði ger, at hann ikki spælir aftur fyrr enn í fyrsta lagi í mars mánaði.

- Eg sum eg havi sagt fyrr, fyri okkum snýr tað seg altíð um tað er tann rætti spælarin. Vit hava ikki keypt Cody Gakpo, tí hinri eru skaddir, vit hava keypt hann tí hann er ein góður spælari, sum vit kunnu fáa nú, sigur Jurgen Klopp, venjari hjá Liverpool.

Tá so Sadio Mané er seldur til Bayern Munchen, hevur Liverpool roynt eydnuna við enn einum keypi um veturin. Eigararnir hjá Liverpool leita í løtuni eftir íleggjarum til felagið og mett verður, at Liverpool í summar fer at keypa stórt til miðvøllin. Har eru bæði Jude Bellingham og heimsmiestarin, Enzo Fernandez, nevndir.