Í Club 20 hevur tað í eini 8 - 10 ár verið fastur táttur at fingið stripparar til Føroya á ólavsøku, og tann siðin hava tey onga ætlan um at broyta.
? Tað koma nógv fólk til Havnar á ólavsøku, men hóast Club 20 liggur mitt í býnum, so kann tað gott vera nærum manntómt her inni, hóast fleiri túsund fólk eru í býnum. Tað veldst alt um veðrið. Er regn á ólavsøku, fáa vit ikki tikið ímóti øllum fólkinum, men um veðrið er gott, kemur eingin inn, uttan so at vit hava okkurt serligt at bjóða ólavsøkukvøldini, siga tey úr Club 20.
Og tað serliga í ár eru gentan Trine Bæk Nielsen og drongurin Max, ið bæði eru vælskapt og til reiðar at vísa tað.
? Ólavsøkan er heilt einfalt ov umráðandi fyri okkum til at vit kunnu seta okkum niður og vóna, at veðrið verður ringt, so at fólk koma inn á gólvið. Vit mugu tryggja okkum, at ólavsøkugestirnir koma inn í Club 20, og tað hevur víst seg, at strippshow er eitt vælegnað tiltak til hetta endamál, siga tey úr Club 20.
Skal vera sjáldsamt
Í Club 20 vænta tey, at hølini verða fullsett báðar ólavsøkudagarnar í hvussu er. Stripptease er eisini hóskvøldið 27. og sunnukvøldið 30., men tá er ikki vist, at náttklubbin verður eins fullur av gestum.
Hóast nógvir stripparar eftir hondini hava vitjað í Club 20 ígjøgnum árini, so ansa tey væl eftir, at varðveita tað sjáldsama við einum slíkum tiltaki.
? Í Reykjavík eru klubbarnir komnir eitt sindur illa fyri av tí. Har hevur verið alt ov nógv stripptease seinastu árini, og nú er tað blivið so galið, at fólk eru farin at krevja tað hvørt vikuskiftið. Soleiðis skal tað ikki ganga her, tí tá gerst stripptease knappliga ein leypandi útreiðsla fyri okkum, heldur enn eitt "gesta-magnet" nú og tá.
Trine hava vit hitt fyrr
Strippararnar hava tey fingið ígjøgnum "Stripperkongen" í Danmark, sum er agentur hjá øllum teimum best umtóktu stripparunum í Danmark, og sum hevur megnað at gerast nærum einaráðandi á marknaðinum fyri stripparar í danska kongaríkinum - harímillum í Føroyum og í Grønlandi.
Max "til tey kræsnu føroysku konufólkini" sum Club 20 málber seg í lýsingini, hevur ongantíð áður verið í Føroyum í arbeiðsørindum, men gentuna, Trine Bæk Nielsen, kennast fleiri føroyingar við.
? Hon var í Club 20 og strippaði fyri tveimum árum síðan. Hon er dugnalig og hevur seinastu tvey árini megnað at vunnið 2. pláss í kappingini um heitið sum besti danski stripparin. Harumframt hevur hon innspælt millum fimm og tíggju pornofilmar, síðan hon seinast var her á landi.
Undirbuksurnar skulu ongan veg
Í Club 20 hava tey fingið at vita frá myndugleikunum, at so leingi strippararnir halda ymiskar reglur um hóvsemi, so er einki forgjørt í at geva fólk løn fyri lata seg úr klæðunum framman fyri gestunum.
Hesar reglur innibera millum annað sovorðið sum at ein ávís fjarstøða skal vera millum stripparan og áskoðararnar, og at stripparin annahvørt skal lata undirbuksurnar vera, har tær eiga at vera, ella skal goyma kynslutirnar á annan hátt.
Og hesar reglur ætla tey í Club 20 at ansa eftir at halda, tí tað loysir seg ikki at stramma streingin ov nógv, verður sagt.
Og hóast tað kanska ikki er eins væl dámt millum øll, so fáa tey í Club 20 ikki reyðar kjálkar av stripparunum.
? Vit eru her fyri teir ungu ólavsøukgestirnar, og royna at geva teimum tað, ið tey vilja hava. Um vit syrgja fyri, at ov ung fólk ikki sleppa inn, og at tey, ið eru inni, skikka sær væl, so er einki øgiligt í hesum. Tá er tað nógv verri við teimum, ið rulla runt í Havnargøtum í føroyskum klæðum, tí tey ikki dugdu at siga nei til teir báðar seinastu snapsarnar, siga tey úr Club 20 og bjóða ólavsøkugestum og stripparum vælkomnum.
