Newcastle - Liverpool 1-0
Ayoze Perez skoraði sítt fyrsta Premier League mál og tryggjaði Newcastle ein 1-0 sigur móti Liverpool. Loic Remy mundi skorað til 2-0, men Simon Mignolet bjargaði skotinum.
Upptúrurin hjá Alan Pardew heldur á, meðan Liverpool nú skal spæla móti Real Madrid og Chelsea, uttan at hava fingið skil á hvørki álop ella verju.
Stoke - West Ham 2-2
Stoke sá út til at hava tryggjað sær sigurin, tá teir tíðliga í øðrum hálvleiki løgdu seg á odda 2-0. Men so vaknaði Stewart Downing. Fyrst skapti hann fyrra málið hjá West Ham, síðani skoraði hann sjálvur útjavnandi málið. West Ham er nú ósigrað í fýra dystir.
Chelsea - QPR 2-1
Eitt brotsspark í 76. minutti skuldi til, áðrenn Chelsea megnaði at vinna á QPR. Eden Hazard skoraði upp á brotssparkið.
Oscar hevði lagt Chelsea á odda í 1. hálvleiki, áðrenn Charlie Austin javnaði fyri QPR, tá umleið ein tími var farin.
Arsenal - Burnley 3-0
Arsenal vann ein tryggan sigur á botnliðnum Burnley. Nýinnkeypti Alexis Sanchez vísti hvat hann dugir, og skoraði tvey mál í dag. Calum Chambers skoraði til 2-0. Arsenal mátti tó arbeiða fyri sigrinum, fyrsta málið kom ikki fyrr enn í 70. minutti.
Hull - Southampton 0-1
Góða gongdin hjá Southampton heldur á. Longu í 3. minutti skoraði Victor Wanyama sigursmálið. Southampton liggur á øðrum plássi eftir 10 dystir. Hull er á 13. plássi.
Leicester - West Brom 0-1
Eitt sjálvmál avgjørdi dystin millum Leicester og West Brom. Annar hálvleikur var bara tveir minuttir gamal, tá argentinski Esteban Cambiasso setti bóltin í egið mál.
Everton - Swansea 0-0
Tað eydnaðist hvørgum liðnum at fáa bóltin í málið í Liverpool í dag. Romelu Lukaku var sentimetrar frá at fáa fótin á bóltin eftir eitt inlegg frá Samuel Eto'o í seinastu sekundunum av dystinum, men tað vildi seg ikki fyri Everton í dag.
