Tað verður Carl Johan Jensen, sum verður føroyska uppskotið til bókmentavirðislønina hjá Norðurlandaráðnum.
Hann er í uppskot fyri skaldsøguna, Eg síggi teg betur í myrkri. Forspæl til ein gleðileik.
- Skaldsøgan er um íslendska skaldið og ævintýraran Benedikt Einarsson, Tá ið bókin byrjar, er hann umborð á ferðaskipinum M/S Lyra á veg úr Bergen til Føroya.
- Hann situr í einum sólstóli á afturdekkinum, tá hann verður fyribeindur, og hann er sostatt í ferð við at doyggja, meðan hann sær tilveru sína fyri sær sum í dreymi.
- Lesarin fær innlit í tankarnar hjá doyggjandi skaldinum og frættir um ógvusligar upplivingar, hann hevur verið fyri í einum lívi, sum er merkt av rembingunum í Europa millum nítjandu og tjúgundu øld.
- Bókin er eitt heilskapað listaverk, har kynstriga hendingagongdin og málið verða samantvinnað í eini óloysandi heild. Málsligi búnin er fjølbroyttur og poetiskur. Málsliga er skaldsøgan merkt av, at høvundin er yrkjari, og heitið á skaldsøguni stavar eisini frá eini yrking hjá Emily Dickinson.
