Órógvið á partabrævamarknaðinum heldur fram eftir bretsku avgerðina um at fara úr ES.
New York. Í kjalarvørrinum av óvæntaða úrslitinum av ES-fólkaatkvøðuni í Stórabretlandi, høvdu amerikansku partabrævamarknaðirnir ringasta dagin í longri tíð.
Tá partabrævamarkanðurin í New York lat aftur í gjárkvøldið, stóð eitt stórt minus upp á 3,4 prosent á Dow Jones-indeksinum.
P 500-indeksið misti 3,6 prosent. Sambært Reuters er kursfallið á Wall Street í gjár tað størsta í tíggju mánaðir.
Afturgongdin stendst av óvæntaða sigrinum til ES-mótstøðufólkið í Stórabretlandi.
Úrslitið av fólkaatkvøðuni skapti órógv kring felags evropisku framtíðina. Fallið á amerikansku partabrævamarknaðunum endursepglar hesa órógv, sum eisini setti sín dám á asiatiskar og evropiskar partabrævamarknaðir eftir bretsku fólkaatkvøðuna.
Serliga bankasektorurin, orkufeløg, ferðavinnan og ídnaðurin eru rakt.
– Hetta er veruliga nakað, ið tekur flestu íleggjarar á bóli, sigur Jack Ablin, sum er seniorráðgevi í BMO Private Bank.
Indeksið fyri fíggjarfeløg fall 5,4 prosent. Tað er størsta fallið í vinnuni einstakan dag síaðni november í 2011.
Sølutrýstið á Wall Street og vanligi ótryggleikin á heimsins fíggjarmarknaðum um avleiðingar av bretsku fólkaatkvøðuni kann fáa týdning fyri amerikansku rentuna.
Ein rentuhækking frá Federal Reserve hevur leingi ligið í kortunum, men nú er ivin týðuligur. Tað heldur Doug Cote, markanaðarstrategur hjá Voya Investment Manegement í New York.
Og tað kunnu verða góð tíðindini fyri partabrøvini, tá ringasta órógvin eftir fólkaatkvøðuna í Stórabretlandi er hasað av, heldur hann.
– Eg síggi fyri mær, at Federal Reserve ikki hækkar rentuna í 2016. Tey hava tikið av borðinum, og tað er gott fyri marknaðirnir, sigur Doug Cote við Reuters tíðindastovuna.
