Tá ið marknaðarføringarlógin varð borin í Tingið beint fyri valið, hevði hon verið ein harðan túr undir trimmaranum. Týðandi partar, eitt nú at vit skulu hava brúkaraumboð og at lýsast skal á føroyskum, sum arbeiðsbólkurin við Vinnumálaráðnum, Kappingarráðnum, Vinnuhúsinum og Brúkarasamtakinum einmælt hevði latið úr hondum, vórðu uttan víðari strikað.
Brúkarasamtakið mótmælti serliga, at brúkaraumboðið varð slept, og at man í staðin ætlaði at leggja umsitingina av lógini undir fleirarmaða stovnin á Skálatrøð. Ein stovn, ið longu í fleiri ár hevur verið um at kvalast í alt ov trongum krókum. Ein stovn, ið harumframt nýliga hevur fingið eina ógvuliga umfatandi og plásskrevjandi kappingarlóg at umsita.
At alt arbeiðið við marknaðarføringarlógini hervið skuldi enda sum ein viðfáningur undir óviðkomandi stjóra, gjørdist eitt satt vónbrot fyri Brúkarasamtakið og føroyska brúkaran. Men ásannast mátti, at man frá politiskari síðu ongar stórar og langtberandi ætlanir hevði á brúkaraøkinum.
Brúkarasamtakið royndi kortini at síggja ljóst uppá málið og gleðast um, at vit hóast alt fingu eina marknaðarføringarlóg. Hetta vardi tó ikki leingi, tí val varð útskrivað, og málið datt burtur.
Nú nýggj samgonga er skipað, er málið tikið fram aftur, og man hevur sett sær fyri at taka brúkaraumboðið við. Hetta fegnast vit um og vilja samstundis vísa á møguleikan at nýta hetta høvið til at leggja lunnar undir ein veruligan miðvísan brúkarapolitikk í Føroyum.
Vit meta heldur ikki, at hesin leistur hevur nakran meirkostnað við sær. Í og við at man hevur gjørt av at seta ein persón at taka sær av marknaðarføringarlógini, hevur tað ein kostnað við sær. Men um hetta brúkaraumboð er undirlagt einum óviðkomandi stjóra ella virkar sum sín egni stjóri, hevur lítla og onga ávirkan á kostnaðin. Tað kann einans snúgva seg um møguligan hægri lønarflokk, um man er stjóri sjálvur, heldur enn at ein annar er tað
Umframt at røkja marknaðarføringarlógina, eigur uppgávan hjá brúkaraumboðnum at vera at rudda upp í øllum verandi og manglandi brúkaraverndarlógum. Brúkaraumboðið ger tilmæli til dagføringar, yvirtøkur og nýgerð av lógum. Brúkaraumboðið skipar fyri breiðari brúkaraupplýsing um prísstøði, vørugóðsku, heilsuviðurskifti, umhvørvisviðurskifti og etisk viðurskifti.
Tað hevur stóran týdning, at vit frá byrjan fáa lagt lunnar undir ein brúkarapolitikk, ið røkkur langt inn í framtíðina. Endamálið eigur at vera, at Føroyar leggja seg eftir evropeiskari lóggávu á økinum. Hetta fær eisini týdning seinni, um EFTA-limaskapur gerst veruleiki.
