Við 9-0 sigri á útivølli ímóti grannunum í NSÍ staðfestu skálamenn í kvøld, at teir eru stórfavorittar at vinna plássið í bestu deildini aftur, sum teir mistu síðsta heyst.
Hetta var størsti sigur, sum er vunnin í næstbestu deildini í ár.
Skála hevur nú 56 stig, og nú tað eru seks umfør eftir hjá bæði Skála og B71 eru tað 12 stig frá oddaliðnum Skála og aftur til B71 á triðja plássi.
14. september fær Skála vitjan av KÍ, og tá ið Skála 20. september fer at spæla á útivølli ímóti 07 Vestur kann tað væl vera, at atgongumerkið til bestu deildina verður við í viðførinum úr Sørvági.
Í kvøld skoraðu bæði Markus Isaksen og Martin Johansen trý mál. Simon Jørgensen skoraði tvey mál, og Andreas Egeberg Jacobsen skoraði eitt mál. At Skála er so suverent topplið sæst aftur á máltindinum, har Skála eigur tríggjar teir ovastu. Simon Jørgensen hevur skorað 19 mál, Martin Johansen hevur skorað 17 mál, og Markus Isaksen hevur skorað 16 mál.
Á NSÍ liðnum í kvøld vóru fyri tað mesta ungir spælarar. Veteranarnir vóru Monrad Holm Jacobsen og Pól Jóhannus Justinussen. NSÍ er á áttanda plássi við 18 stigum. Tað eru tvey stig fram til KÍ og trý stig aftur til B36. KÍ og B36 hittast í annaðkvøld í Klaksvík.
Næsti dystur hjá NSÍ verður 13. september á útivølli ímóti B71.
