Ein spreinging hevur verið uttan fyri eitt stórt felag í flog- og verjuídnaðinum nærhendis turkiska høvuðsstaðnum, Ankara.
Tað siga turkiskir miðlar sambært tíðindastovuni AFP mikudagin.
Eisini er boðað frá byrsuskotum.
Innanríkisráðharrin í Turkalandi, Ali Yerlikaya, sigur sambært AFP, at tað eru deyð og særd. Hendingin verður nevnd "yvirgangsálop".
- Yvirgangsálop varð framt móti Turkish Aerospace Industries. Tíverri eru pínslarváttar og særd fólk, skrivar Yerlikaya á sosiala miðlinum X.
Enn er ikki greitt, hvussu nógv eru deyð ella hava fingið skaða.
Sjónvarpsstøðin Habertürk skrivar, sambært AFP, at tað er ein "gíslastøða" í gongd. Ongar fleiri smálutir vórðu upplýstir beinanvegin.
Álopið fór fram á høvuðssætinum hjá felagnum, sum liggur umleið 40 kilometrar uttan fyri Ankara.
Sambært almennu turkisku tíðindastovuni Anadolu eru bjargingarlið send á staðið.
Myndir frá turkisku sjónvarpsrásini NTV vísa eitt stórt roykskýggj uttan fyri inngongdina til staðið.
Spreingingin skal hava verið umleið klokkan 16:00 lokala tíð - t.v.s klokkan 14:00 danska tíð.
Sambært tíðindastovuni Reuters boða nakrir miðlar frá einum sjálvmorðsálopi, men enn er óvissa um júst hvat hendi.
Felagið verður av Reuters lýst sum eitt tað týdningarmesta í Turkalandi innan verju og flogferðslu.
Millum annað framleiðir hon stríðsflogfarið Kaan, sum er fyrsta tjóðarstríðsflogfarið hjá Turkalandi.
Stór handilsráðstevna fyri verju- og loftrúmdarvinnuna verður hesa vikuna í Istanbul. Uttanríkisráðharrin í Ukraina, Andrij Sybiha, hevur luttikið her.
/Ritzau/