Valstríð
Bjarni Djurholm hevur í fjølmiðlunum úttala seg um, at hann metir, at ríkisrættarligi spurningurin væl kann verða loystur innanfyri ríkisfelagsskapin.
?Vit eiga at fara burtur frá øsingini um viðurskiftini millum Føroyar og Danmark ? og í staðin skipa eitt samveldi millum londini, skrivaði Bjarni Djurholm m.a. í Sosialinum leygardagin.
Í sama blaðið var eisini ein grein, har fólkafloksmaðurin, Poul Michelsen, bjóðaði seg fram sum valevni við teirri treyt í einari samgongu, at fullveldistilgongdin sleppur at halda fram í einari samgongu.
Høgni Hoydal, formaður fyri Tjóðveldisflokkin, heldur ikki nógv um útsagnirnar hjá Bjarna Djurholm.
?Tað er eingin loynidómur, at Bjarni Djurholm ikki hevur verið samdur við fullveldisætlanini. Við hesum roynir Bjarni Djurholm at skapa trupulleikar, sigur Høgni Hoydal.
Formaðurin fyri Tjóðveldisflokkin sigur, at Tjóðveldisflokkurin heldur seg til gjørdar avtalur.
?Tað kann tykjast løgið, tí tað er Fólkaflokkurin, sum eigur uppskotið til tann leist, ið sjálvstýristilgongdin nú koyrir. Tað, ið Bjarni Djurholm sigur, gongur beint ímóti øllum tí, ið samgongan stendur fyri. Tað hevði verið betri og lættari, um Bjarni Djurholm bara meldaði seg inn í Sambandsflokkin, tí hetta, hann nú førir fram, liggur nógv tættari upp at Sambandsflokkinum enn nøkrum øðrum, sigur Høgni Hoydal.
Bjarni Djurholm hevur, sambært Høgna Hoydal, altíð vent sær nógv ímóti ætlanunum ímóti sjálvstýri. Høgni Hoydal ætlar sær at taka málið innanhýsis í samgonguni og ikki fara út í fjølmiðlarnar at kjakast um evni.
