Tað hevði klætt Fólkaflokkinum at fingið nýggjan formann, sum eigur so dyggan stuðul millum veljararnar. Tað sigur Bjarni Djurholm, løgtingsmaður hjá Fólkaflokkinum.
Og hann er alt annað enn nøgdur um innstillingina til formann í Fólkaflokkinum. Bjarni Djurholm sigur, at tað er stórt spell, at Annika Olsen, sum vann valið fyri Fólkaflokkin, ikki gjørdist formansevni hjá ting- og landsstýrismanning floksins.
Uppaftur meira undanarsamt er tað, at tepri meirlutin í somu manning ikki loyvdi Anniku Olsen at vera í uppskoti sum annað av tveimum formansevnum, sum landsleiðslan so kundi taka støðu til.
Bjarni Djurholm vísir á, at Annika Olsen og Jacob Vestergaard fingu triðju hvørja atkvøðu floksins til løgtingsvalið.
Tað vóru sostatt tey bæði, saman við greiða politikkinum hjá flokkinum, sum dyggiliga vunnu valið. Tað er eingin ivi um tað. Tí er tað stórt spell, at nú Annika Olsen bjóðaði seg fram sum forkvinna, at hon ikki fekk kjansin at royna seg í móti sitandi formanni, sigur Bjarni Djurholm.
Tað hevði klætt Fólkaflokkinum at fingið nýggjan formann, sum eigur so dyggan stuðul millum veljararnar, sigur Bjarni Djurholm.
