Í 2009 vórðu seld 1.053 akfør tilsamans í Føroyum. Hetta er stór afturgongd í mun til 2008, tá seld vóru 1.947 akfør.
Í yvirliti hjá Akstovuni sæst, at sølan av persónbilum minkaði úr 1.240 bilum í 2008 til 693 bilar í 2009. Hetta er ein afturgongd upp á 44,11%.
Sølan av vøruvognum er eisini nógv minkað. Í 2008 vórðu seldir 289 vøruvognar, meðan teir bert vóru 92 í 2009. Hetta er ein afturgongd upp á 68%. Nevnast kann, at í 2007 vóru seldir 428 vøruvognar, so her er talan um eina risastóra afturgongd.
Samlaða bilasølan minkaði í 2009 við 45,92% í mun til 2008. Sølan í 2008 minkaði við 30% í mun til 2007.
Tá ringast stóð til í búskaparkreppuni fyrst í nítiárunum var bilasølan metlág. Tað eina árið vórðu bert seldir 125 bilar tilsamans.
Mest seldu bilmerkini í Føroyum í 2009 vóru hesi:
Toyota 121
Citroen 114
Ford 94
Suzuki 76
Mitsubishi 46
Kia 46
Peugeot 44
Opel 40
Brenderup 37
Honda 33
