Hósdagin verða hurðarnar í nýggjasta peningastovninum í Havn latnar upp.
Hóast tað hevur verið góður siður seinastu árini at lata deildir aftur, so ger Suðuroyar Sparikassi júst tað mótsetta. Stovnurin hevur nú tríggjar deildir: Høvuðsdeildin í Vági og eina deild í Porkeri, umframt hana á Káta Horninum í Havn.
Tað er Jóannes S. Hansen, sum verður deildarstjóri á nýggju deildini, og aftrat sær hevur hann fingið Gudrun Christiansen. Tey hava bæði arbeitt í Føroya Banka, og Eyð Jacobsen, sum starvaðist í Sjóvnnubankanum.
Røkja viðskiftaskaran norðanfjørðs
Um orsøkina til at nýggj deild verður latin upp í Havn, sigur Jóannes S. Hansen, at tað hevur víst seg, at tá suðuroyingar flyta norðanfjørðs, missir stovnurin samband við tey.
Ofta er samskiftið torført, men eisini fáa viðskiftafólk at vita í øðrum peningastovnum teir vitja, at tað er lættari, um tey hava lønarkonto í peningastovni á staðnum. Tað er eisini lættari um fólk skulu keypa ella byggja hús, og tílíkt, sigur nýggi deildarstjórin.
Nógv fluttu í annan stovn í kreppuárunum
Er tað ikki løgið at tosa um vánaligt samskifti,tá fólk kunnu sita flyta um heimagreiðslu?
Vit hava eisini nógvar kundar her norðuri, sigur Jóannes S. Hansen. Hann greiðir frá, at nógvar broytingar fóru fram í føroyska fíggjarheiminum í kreppuárunum.
Bæði privatpersónar og virkir fluttu tá í Suðuroyar Sparikassa. Hesi viðskiftafólk vil deildin í Havn eisini bjóða góða tænastu.
Harnæst vilja vit økja um okkara virksemi, og eisini um tænastuna, sigur deildarstjórin.
Viðvíkjandi heimagreiðsluni, er Jóannes S. Hansen vísur í hevur sínar fyrimunir, hóast ein fremmandagerð liggur í hesum. Tí skulu fólk hava møguleikan at støkka inn á gólvið í deildum Sparikassans.
Ræðist fremmandagerðingina
Vit liva ikki í Paris ella London, men í Føroyum og hava okkara egnu mentan. Í Suðuroyar Sparikassa vilja vit bjóða so góða tænastu sum til ber
Eg ræðist tann dagin, tá vit ikki kenna okkara viðskiftafólk, sigur Jóannes S. Hansen, og leggur aftrat, at deildin í Havn ikki er stovnað fyri at gera kappingarneytunum ónáðir, ella tí teir vilja líkjast øðrum.
Vit hava stovnað okkara egnu deild, við okkara egnu mentan og tænastu at bjóða fólki.
31 ár í Føroya Banka
Jóannes S, Hansen starvaðist í Føroya Banka í 31 ár, men varð uppsagdur í januar 1997.
Hann varð tó ikki arbeiðsleysur, men hevur arbeitt eitt skifti í Noregi sum skrivstovustjóri í fyritøku, ið umsetti fyri 40 mió. krónur í fjør.
Tað kom av, at pápi hansara í sínari tíð seldi tunnur til fyritøkuna, og at familjurnar síðan hava varðveitt sambandið.
Tá Jóannes kom aftur í fjør, gingu bert nakrir dagar, so vóru boð eftir honum at koma til arbeiðis í málingahandli í Runavík.
Hvussu kennist tað at fara at starvast í peningastovni hjá gamla kappingarneytanum?
Tað havi eg als ongar trupulleikar av, serliga tí eg kenni meg so vælkomnan í Suðuroyar Sparikassa. Eg eri harnæst fegin um at fáa starv innan gamla yrkið mítt, sigur Jóannes S. Hansen.
