Tá Ransin Djurhuus gavst at floyta, plagar sokallaða bakkakórið at syngja ein sang. Soleiðis var ikki sunnudagin. Heldur ikki var nógvur gleimur annars kring vøllin, og tað legði Egil á Bø, liðskipari til merkis.
- Tey plaga at syngja, tá dysturin er liðugur, men tað var ikki í gjár. Men annars haldi eg áskoðararnar vera fínar, sigur liðskiparin, tá hann verður spurdur um áskoðararnar hjá verandi meistarunum.
Til dystin sjálvan metir Egil á Bø, at úrslitið speglaði gongdina, og at EB/Streymur hevði sigurin uppibornan.
- Vit høvdu nøkur góð álop og defensivt haldi eg, at vit spældu væl, sigur liðskiparin.
Leif Niclasen hevur skotið trý mál fyri EB/Streym í ár. Tað seinasta var eitt vakurt mál sunnudagin, og hetta tekur ikki Egil á Bø á bóli.
- Leif ger onkuntíð tílíkt í venjing, og hann er eisini ein gamal áloypari, so tað er ikki so løgið, sigur Egil á Bø
