B36 hevur sett Jóhan Hofgaard sum fysiskan venjara hjá felagnum. Jóhan hevur útbúgving innan ítrótt og venjing og royndir innan fysiska venjing, skrivar B36.fo.
B36 ger í løtuni rúm í niðastu hæddini, sum skal virka sum innandura venjingarrúm hjá spælarum í B36. Nýggj venjingarútgerð til hetta er útvegað, og er tað her, at Jóhan fer at hava fysiskar venjingar, boðar felagið frá.
Her í vetur verður lagt út við Betri monnum, Betri kvinnum og Gentum 18, umframt 1. deild, U21 og U17-deildini hjá dreingjum. U15 og U13-deildin hjá gentum og dreingjum fara eisini at fáa ágóðan og grundlæring saman við Jóhan og øðrum, og byrjar hetta eitt sindur seinni, skrivar B36.fo
- B36 metir at hetta er ein røtt leið at fara og íløga at gera fyri at betra um venjingar og umstøður hjá spælarunum í B36. Fyrr ella seinni fáa allir leikarar ágóða av hesum, so hvørt, sum teir koma upp í aldur. Hetta verður spennandi at fylgja, og vónandi fer hetta at leggja lunnar undir enn betri spælarum hjá B36, verður sagt úr B36.
Jóhan Hofgaard er fimti maðurin í venjaratoyminum hjá besta liðnum hjá B36. Umframt høvðusvenjaran Jákup á Borg, so eru Fróði Clementsen, Tróndur Vatnhamar og André Olsen knýttir at venjaratoyminum hjá besta liðnum.
