Lítil ivi er um, at tað var ein røtt avgerð hjá Bátafelagnum á Toftum at útseta ársins fyrsta bátafestival í eina viku.
Ætlandi skuldi festivalurin vera seinasta leygardag, men stutt frammanundan - einar tveir dagar ella so - gjørdi nevndin í felagnum, sum stendur aftanfyri festivalin av, at útseta tiltakið í eina viku - við at kalla óbroyttari skrá.
DMI sigur, at í morgin - fríggjadagin - verður gott veður, 3-8 metrar um sekundið við hita upp í 13 stig.
Leygardagin verður sambært donsku veðurstovuni á leið sama veður, 3-8 metrar um sekundið, og hitin kemur upp í eini 10 stig.
Bæði fríggjadagin og leygardagin verður sagt frá turrum veðri - fyri tað mesta - og av og á sær sólin.
Sunnudagin verður um leið sama veður, 2-5 metrar um sekundið, men sunnukvøldið verður hann landsynningur, og tá kann vindurin koma upp í einar 10-15 metrar um sekundið.
Samanumtikið sigur veðurstovan hjá DMI frálíkt bátastevnuveður.
Tí kunnu tey, sum standa aftanfyri tiltakið í Nes kommunu, fegnast um, at bátafestivalurin ikki varð hildin seinasta leygardag, tá serliga fyrraparturin royndist vánaligur.
