Tá ið klaksvíkingar vandu ólavsøkuaftan, varð landsliðsmálverjin Jákup Mikkelsen skaddur. Síðani hevur hann ikki verið førur fyri at venja, og tað er sera ivasamt, um hann verður førur fyri at spæla í Streymnesi sunnudagin. Um Jákup ikki verður við, so verður tað 17 ára gamli Eilif Arge, ið fer at verja KÍ málið.
Talan er um vøddaskaða í lærinum. Jákup hevur fingið viðgerð síðani mikudagin. Talan er um kapping við tíðina, og tað tykist ganga rætta vegin. Men í Klaksvík høvdu tey fyrrapartin ikki serliga gott mót um, at tað skal ganga so skjótt, at Jákup verður førur fyri at spæla longu sunnudagin.
Vongverjin í vinstru, Jógvan Isaksen, verður heilt víst ikki við. Hann sá gult í Sørvági og er tí leikbannaður. Heldur ikki venjarin Alexander Djordjevic verður við á KÍ beinkinum. Hann er staddur uttanlands, og tí verður tað Eyðun Klakstein, sum fer at hava ábyrgdina av KÍ liðnum.
Hjá EB/Streymi er hinvegin betri vorið. Venjarin er útskiftur og allir mans eru tøkir. Tað kemur væl við, tí ein sigur á KÍ má metast at vera eitt krav.
Hetta skuldi heldur ikki verið ein ógjørlig uppgáva, tí eftir tapið í steypafinaluni eru heimamenninir svangir eftir at prógva, at teir framvegis teljast millum landsins bestu lið.
